Lang­afi dæmdi hjá langafabarni sínu

Það eru allir tilkallaðir og tilbúnir að hjálpa til þegar kemur að því að halda svona stórt mót.

Þar má því oft sjá gamlar goðsagnir mæta aftur niður á gólfið og taka að sér dómarahlutverkið.

Njarðvíkingar sögðu frá einni slíkri skemmtilegri sögu á miðlum sínum. 

Hilmar Hafsteinsson dæmdi nefnilega leik í Nettó-mótinu í Ljónagryfjunni í Njarðvík í dag og hann var þá að dæma hjá langafabarni sínu Dagnýju Hafsteinsdóttur og stöllum hennar í Njarðvíkurliðinu.

Hilmar er fyrrum leikmaður Njarðvíkur en hann gerði líka karlalið Njarðvíkinga að Íslandsmeisturum árið 1982, vann titla sem yngriflokkaþjálfari í Njarðvík og er handhafi Gullmerkis KKÍ.

Það er óhætt að segja að Njarðvíkingar hafi fengið góð og skemmtileg viðbrögð í athugasemdum við færsluna enda magnað að sjá mann með vilja, þekkingu og getu til að dæma hjá langafabarni sínu og halda áfram að gefa félaginu sínu sem hann hefur gefið svo mikið til félagsins í alla þessa áratugi.