Sagði 35 sinnum fyrir­gefðu við boltastrákinn

Atvikið gerðist í blálokin, þegar staðan var 4-2 fyrir Parísarliðið, en heimamenn náðu að bæta við marki og vinna leikinn 5-2.

Neto lagði báðar hendur á ungan boltastrák í uppbótartímanum sem varð til þess að strákurinn féll í stól og olli miklum átökum milli beggja liða á Parc des Princes.

Ég er þegar búinn að tala við hann

Þegar Neto var spurður út í atvikið á TNT Sports eftir leikinn sagði hann: „Ég vil biðja boltastrákinn afsökunar. Ég er þegar búinn að tala við hann,“ sagði Neto.

„Við vorum að tapa og í hita leiksins vildi ég ná í boltann fljótt og hrinti honum aðeins. Ég er ekki svona. Þetta gerðist í hita augnabliksins og ég vil biðjast afsökunar. Ég gaf honum treyjuna mína. Mér þykir þetta virkilega leitt og mér finnst ég verða að biðja hann afsökunar,“ sagði Neto.

Sagði honum að ég væri ekki svona.

„Franskan mín er ekki mjög góð og liðsfélagi minn í portúgalska landsliðinu, Vitinha, kom og sagði honum að ég væri ekki svona. Í lokin brosti hann [boltastrákurinn] og ég gaf honum treyjuna mína og baðst afsökunar svona 35 sinnum. Hann sá hvað hafði gerst og var ánægður með útkomuna,“ sagði Neto.

Óvíst er hvort Neto muni sæta frekari refsingu frá UEFA, en gjörðir hans áttu sér stað í miðju hruni Chelsea-liðsins.

Liam Rosenior aðalþjálfari tók undir afsökunarbeiðnina og bætti við: „Ég sá að það urðu einhver átök við boltastrákinn. En ef eitthvað af okkar hálfu var rangt eða óviðeigandi, þá biðst ég afsökunar fyrir hönd félagsins.“

„En ég held að Pedro hafi gert það í viðtölum. Ég hef satt best að segja ekki séð þetta aftur,“ sagði Rosenior.