Snarpri en verð­mætri loðnu­ver­tíð að ljúka

Í fréttum Sýnar mátti sjá myndir frá loðnumiðunum undan Snæfellsjökli þar sem loðnuskipin hafa síðustu daga verið að veiðum. Myndirnar tók Björn Steinbekk í gær um borð í Hákoni ÞH, skipi Gjögurs á Grenivík. Þær sýna vel hvernig nótin hringast um loðnutorfuna. Nótin er svo dregin saman upp að skipinu.

Neðansjávarmyndir sem Elís Hólm Þórðarson, stýrimaður á Venusi NS, skipi Brims, tók einnig við Snæfellsnes í gær sýna loðnuna í pokanum þegar búið að herpa nótina saman. Loðnunni er síðan dælt inn í lestar skipsins.

Þetta var síðasti túr Venusar og kom skipið inn til Akraness í morgun til löndunar. Þar var Víkingur AK að landa og var þá aðeins eitt skip Brims, Svanur RE, enn úti á miðunum að ljúka veiðum.

Skip Síldarvinnslunnar í Neskaupstað hafa lokið loðnuveiðum. Börkur NK kom með farm inn til Norðfjarðar í gær og Beitir NK bíður löndunar. Grænlensku skipin Polar Amaroq og Polar Ammassak eiga einnig eftir að landa í Neskaupstað.

Á heimasíðu Síldarvinnslunnar lýsa skipstjórar ánægju með vertíðina. Tómas Kárason á Beiti sagði að þetta hafi verið snörp en góð vertíð.

Skip Vinnslustöðvarinnar í Vestmannaeyjum komu til hafnar í fyrrakvöld í síðustu loðnutúrum þessarar vertíðar hjá fyrirtækinu. Á heimasíðu Vinnslustöðvarinnar segir Sindri Viðarsson, sviðsstjóri uppsjávarsviðs, vertíðina hafa gengið afar vel. Vinnslustöðin myndi ná að framleiða allt sem stefnt var að, bæði í heilfrystingu og hrognum.

Hjá Ísfélaginu í Vestmannaeyjum sagði Eyþór Harðarson útgerðarstjóri að skip Ísfélagsins hefðu í dag átt eftir um tvöþúsund tonn óveidd. Álsey og Heimaey væru enn á miðunum og þau myndu væntanlega klára kvótann á morgun.

Eyþór sagði að loðnukvótinn hafi verið nægilega stór til að fylla á alla mikilvægustu og verðmætustu manneldismarkaði. Þrátt fyrir að ekki hefði reynst unnt að veiða neitt til fiskimjölsvinnslu sagði Eyþór að þetta yrði að teljast góð loðnuvertíð.