Á annan tug ferða­langa fastir á Holta­vörðu­heiði

Þetta kemur fram í tilkynningu frá Slysavarnafélaginu Landsbjörg. Ferðalangar í að minnsta kosti tveimur bílum hafi til að mynda verið í vandræðum á Klettshálsi. Fóru björgunarsveitirnar Heimamenn frá Reykhólum og Lómfell á Brjánslæk á staðinn til að aðstoða þá.

Þar að auki voru þó nokkur verkefni á Súðavík fyrir björgunarsveitina Kofra, bæði innan bæjar en líka inn í Djúpi, að sögn Landsbjargar.

Veður er sagt fara enn versnandi og nú á suðvesturhorninu. Biðlar Landsbjörg því til þeirra sem þurfa að vera á ferðinni að fara ekki vanbúin af stað.

Erfiðar aðstæður víða

Þó nokkur snjóflóð hafa fallið á norðan­verðum Vest­fjörðum í dag en ekki er talin hætta í byggð sem stendur. Þá var Flat­eyrar­vegi lokað í kvöld vegna snjóflóða­hættu. Einnig er varað við aðstæðum á Norðvestur­landi og við Hellis­heiði.

Gul viðvörun hefur verið gefin út fyrir Vestfirði, Suðurland, Faxaflóa, Breiðafjörð, Strandir og Norðurland vestra. Á Norðurlandi varar Veðurstofan við snjóflóðahættu á Siglufjarðarvegi og Ólafsfjarðarvegi.

Að sögn veðurfræðings Vegagerðarinnar er hríð á fjallvegum á norðvestanverðu landinu og getur færð spillst frá Snæfellsnesi og austur að Tröllaskaga. Hvasst og blint í éljum og skafrenningi á Hellisheiði og í Þrengslum í nótt, frá klukkan 22 til klukkan 7 í fyrramálið. Einnig ber á snörpum vindhviðum, um 35 metrar á sekúndu, undir Eyjafjöllum í nótt til 9 í fyrramálið.