„Hefðum unnið þá í fram­lengingunni í staðinn“

„Ég er ánægður að ná sigrinum og að ná að loka þessu. Við vorum með góða stjórn á stórum hluta af leiknum og vorum eiginlega með þá allan tímann fyrir utan í fjórða leikhlutanum þar sem þeir voru að setja niður mjög erfið skot,“ segir Jakob strax að leik loknum.

,Lið KR hefur verið í mörgum jöfnum viðureignum á þessari leiktíð sem og reyndar á síðasta tímabili. Spurður að því hvort hann sjái mikinn mun núna á liðinu í þessum aðstæðum segir Jakob að þetta sé æfing og liðið sé orðið þaulreynt að spila svona leiki.

„Þetta kemur með æfingunni og endurtekningunni. Við vorum í mörgum jöfnum leikjum í fyrra og höfum verið í töluvert af svona leikjum í vetur. Þetta kemur með því að vera í svona leikjum aftur og aftur. Okkur líður betur í þessum aðstæðum þegar leikirnir eru jafnir og vitum svolítið betur að hverju við erum að leita, hverja við viljum hafa á boltanum og svo framvegis. Okkur líður ágætlega í svona aðstæðum.“

Lygileg lokasókn 

Lokasóknin í kvöld var afar dramatísk þar sem KR vann leikinn eftir að Mirza Bulic, sem hafði sennilega verið besti leikmaður Keflavíkur í kvöld, slær boltann yfir hringnum í lokaskoti leiksins. Dómarar leiksins gáfu sér góða stund til þess að fara yfir þetta áður en þeir dæmdu körfuna góða. Fór eitthvað um þig á meðan þeir réðu ráðum sínum?

„Það fór svo sem ekki neitt um mig. Ef að þeir hefðu ekki dæmt þessa körfu þá hefðum við bara farið í framlenginguna. Mér finnst við vera með betra lið en Keflavík og við hefðum unnið þá í framlengingunni í staðinn.“

Tóti í Túrbógírnum 

Þórir Þorbjarnarson var stórkostlegur fyrir KR í kvöld. Ekki aðeins setti hann niður 27 stig þá gaf hann einnig 11 stoðsendingar ásamt því að koma inn með risa körfur þegar mest á reyndi. Hvað hefur þjálfarinn um hann að segja?

„Frammistaða hans var bara frábær. Hann steig upp þegar við byrjuðum hægt og hélt okkur svolítið inni í þessu í fyrsta leikhluta. Þetta var mjög góður leikur hjá honum þar sem hann gerði bæði vel í að skora og finna liðsfélaga sína.“