„Gerðum heiðarlega til­raun til að henda þessu frá okkur í restina“

„Mér líður mjög vel með góðan sigur, númer eitt, tvö og þrjú. Þetta var hörku leikur á milli tveggja mjög góðra liða, það var hart barist og mikið um mistök á báða bóga,“ sagði Jóhann eftir leikinn.

„Mögulega ekki fallegur körfubolti lengi vel en góður sigur hjá mínum mönnum. Við vorum að spila allt í lagi í fyrri hálfleik en hittum illa, við fórum svo að setja niður skot og þá eitthvernveginn náðum við augnablikinu til okkar og héldum því í rauninni til loka.“

Stjarnan var með forystuna nánast allan leikinn eða þar til Grindavík náði á stórkostlegan hátt að jafna leikinn. Grindvíkingar komust svo yfir í fjórða leikhluta en liðið kastaði næstum því frá sér sigrinum á lokamínútunum.

„Við gerðum heiðarlega tilraun til að henda þessu frá okkur í restina með því að flýta okkur en það tókst ekki sem betur fer.“

Aðspurður hvernig honum leið á lokamínútum leiksins þegar Stjörnunni tókst að minnka muninn niður í tvö stig sagði hann:

„Þegar öllu er á botninn hvolft þá er þetta bara körfubolti. Miðað við verkefnin sem ég hef fengið í lífinu undanfarin misseri þá er maður bara ánægður að fá að labba héðan út. Ef við hefðum tapað þá hefði það bara verið næsti leikur, ég er ekkert stressaður hvað það varðar, alls ekki.“

Grindavík trónir þá á toppi deildarinnar og eru búnir að tryggja sér deildarmeistaratitilinn og heimavallarrétt út úrslitakeppnina.

„Við erum búnir að tryggja efsta sætið en samt tveir leikir eftir. Við verðum að klára þetta á góðum spretti og koma á góðum takti inn í skemmtilegasta tíma ársins.“