Guardiola hrein­skilinn: „Ef við töpum stigum er þetta búið“

City sækir West Ham, sem er í fallsæti, heim í kvöld. Strákarnir hans Guardiola eru í 2. sæti ensku úrvalsdeildarinnar með sextíu stig, sjö stigum á eftir toppliði Arsenal sem hefur leikið einum leik meira en City.

Leikur West Ham og City hefst klukkan 20:00 en þá verður leik Arsenal og Everton nýlokið. Svo gæti farið að Arsenal verði með tíu stiga forskot þegar flautað verður til leiks á Lundúnaleikvanginum í kvöld.

Guardiola segir að ekkert annað en sigur sé í boði fyrir City í leik kvöldsins.

„Núna er það West Ham. Af öllum titlum er erfiðast að verða Englandsmeistari. Við erum enn í baráttunni en ef við töpum er þetta búið,“ sagði Guardiola sem er meðvitaður um að leikur kvöldsins verður erfiður, enda er West Ham í harðri fallbaráttu.

„Ég hef alltaf sagt að þegar kemur að síðustu tíu leikjunum eru öll liðin að keppa að einhverju; í fallbaráttu, baráttu um Evrópusæti eða um titilinn. Þú færð ekki annað tækifæri.“

City tapaði 3-0 fyrir Real Madrid á Santiago Bernabéu í fyrri leik liðanna í sextán liða úrslitum Meistaradeildar Evrópu á miðvikudaginn. Liðin mætast öðru sinni á Etihad á þriðjudaginn kemur.

Leikur West Ham og Manchester City hefst klukkan 20:00 og verður sýndur beint á Sýn Sport.