Matthías skráði nýjan kafla í skíðasöguna

Frá þessu er greint á vef Skíðasambands Íslands þar sem Matthías segist reyndar ekki hafa átt sinn besta dag, þó að árangurinn væri „ekki slæmur“.

Keppt var við erfiðar aðstæður, í Narvik í Noregi, og var Matthías í 14. sæti eftir fyrri ferðina, 0,84 sekúndum á eftir Bretanum Luca Carrick Smith.

Matthías vann sig hins vegar upp um þrjú sæti í seinni ferðinni og endaði 1,34 sekúndu á eftir heimsmeistaranum Giuliano Fux frá Sviss. Hann var aðeins 89/100 úr sekúndu frá verðlaunasæti.

„Ekki minn besti skíðadagur en þetta er ekki slæmur árangur, það er gaman að skrifa nýjan kafla í skíðasögunni á Íslandi,“ sagði Matthías eftir að eigin sögn erfiðan dag með mismunandi skyggni og aðstæðum sem hentuðu vel þeim sem skíðuðu snemma.

Matthías var einn fjögurra Íslendinga í keppninni. Bjarni Þór Hauksson endaði í 27. sæti en þeir Arnór Alex Arnórsson og Torfi Jóhann Sveinsson náðu ekki að ljúka keppni.