Vann milljónir í sjón­varpi: „Hann gæti boðið okkur út að borða“

Martin Hermannsson er einn leikmanna Alba Berlín og samkvæmt grein í Tagesspiegel söfnuðust leikmenn saman á heimili Bogojevic á mánudaginn til að fylgjast með þættinum, sem var tekinn upp fyrir fram.

Bogojevic hafði einmitt verið með einn leikmannanna, fyrirliðann Jonas Mattisseck, sem símavin í þættinum en nýtti hann þó ekki.

Bogojevic, sem er 49 ára og fæddur í Júgóslavíu, hefur lengi starfað fyrir Alba Berlín og var áður leikmaður félagsins.

Hann endaði á að vinna 64.000 evrur, eða jafnvirði um 9,2 milljóna króna. Síðasta spurningin sem hann fékk snerist um það hvert væri helsta umfjöllunarefnið í helmingi tíu mest seldu tímaritanna í Þýskalandi. Bogojevic var að hugsa um að segja „slúður“ en ákvað í staðinn að ljúka keppni og fá fyrrgreinda upphæð en rétt svar hefði skilað honum 125.000 evrum. Rétta svarið var hins vegar „sjónvarpsdagskrá“ svo ákvörðun þjálfarans um að hætta reyndist rétt.

„Fyrir 64.000 evrur gæti hann boðið okkur út að borða,“ sagði fyrirliðinn Mattisseck léttur þegar þátturinn hafði verið sýndur.

Upphæðina ætla Bogojevic og kona hans hins vegar að nýta í að byggja sér nýtt hús og sagði þjálfarinn að sér veitti ekkert af peningunum því enginn yrði ríkur af því að vera í þýskum körfubolta.

„Ef ég væri þjálfari hjá knattspyrnufélagi þá hefði ég örugglega ekki sótt um að komast í þennan þátt,“ sagði Bogojevic léttur í bragði.