Gaf stoðsendingu á son sinn og setti enn eitt metið

NBA-deildin segir að LeBron James hafi gefið fyrstu stoðsendingu milli feðga í sögu deildarinnar þegar hann sendi boltann á Bronny James sem skoraði þriggja stiga körfu í öðrum leikhluta í leik Los Angeles Lakers gegn Brooklyn.

Feðgarnir í liði Lakers spiluðu saman mikilvægar mínútur í öðrum leiknum í röð þegar Lakers sneri aftur heim eftir vel heppnaða keppnisferð.

Bronny James var inni á vellinum með föður sínum í tæpar fjórar og hálfa mínútu eftir að þeir komu saman inn á í byrjun annars leikhluta.

Báðar kynslóðir skoruðu á meðan þær spiluðu saman. LeBron skoraði úr sniðskoti áður en hann og Bronny skiptust á sendingum í næstu sókn, sem lauk með því að Bronny setti niður þriggja stiga skot.

„Ég tek þessu ekki sem sjálfsögðum hlut. Þetta eru tveir leikir í röð þar sem hann spilar mikilvægar mínútur og hann átti líka aðra góða sókn. Klárlega flott augnablik fyrir okkur og líka fyrir fjölskylduna okkar,“ sagði LeBron um fyrstu feðgastoðsendinguna í sögu NBA.

Bronny James hefur að mestu spilað þegar úrslit eru ráðin á þessu tímabili, hans öðru með Lakers, en hefur einnig spilað með G-deildarliði félagsins á tímabilinu.

En þar sem byrjunarliðsbakvörðurinn Marcus Smart hefur verið frá vegna meiðsla síðustu tvo leiki fékk Bronny mínútur í leikjum Lakers gegn Indiana og Brooklyn í þessari viku.

LeBron og Bronny eru líka fyrstu feðgarnir til að spila í NBA-deildinni á sama tíma, hvað þá í sama liði.

Hinn 41 árs gamli LeBron James er að spila sitt 23. tímabil í deildinni og er að skila 20,9 stigum, 6,9 stoðsendingum og 6,0 fráköstum að meðaltali í leik.