„Það hljóta að vera ein­hver geim­vísindi á bak­við þetta“

„Ég er ótrúlega ánægður með baráttuna sem við lögðum í leikinn, sérstaklega í seinni hálfleik,“ sagði Ólafur en þrátt fyrir erfiðan fyrri hálfleik  var hann sáttur með frammistöðu liðsins.

Annar leikhluti hjá liðinu var vægast sagt slakur en liðið setti niður 14 stig á móti 33 hjá Haukum.

„Við hittum náttúrulega ekki neitt í fyrri hálfleik, það var smá stress og svona. Virkilega skemmtilegur leikur samt fyrir áhorfendur, upp og niður, læti og slagsmál og ég elska það.“

Ólafur átti erfitt með að útskýra hvað hafi farið úrskeiðis hjá liðinu í öðrum leikhluta en sá kafli leiksins reyndist liðinu dýrkeyptur.

„Við hittum ekki neitt og ég veit það svo sem ekki, ég þarf að kíkja á það. Það hljóta að vera einhver geimvísindi á bakvið þetta en við þurfum að skoða það bara.“

Stjarnan var í með yfirburði í seinni hálfleik og munaði einungis sex stigum á liðunum þegar flautað var til leiksloka.

„Maður hefði kannski viljað fá svona tvær mínútur í viðbót en neinei, það munaði ekki miklu. Við vorum náttúrulega að elta og mínar konur voru orðnar ansi þreyttar hérna í lokinn en við gáfumst aldrei upp.“

„Við þurfum að fara inn í næsta leik af æðruleysi. Við erum með landsliðið á móti okkur, þetta eru stelpur sem eru ríkjandi meistarar með frábært lið og landsliðsþjálfara. Þetta er náttúrulega ótrúlega erfitt einvígi en við munum bíta frá okkur það er alveg klárt.“