Óttaðist enda­lokin fyrir þrettán árum

Hinn 38 ára gamli Rúnar tilkynnti að ferlinum væri lokið á samfélagsmiðlum í gær. Hann er þó ekki alfarið hættur í sportinu, og verður áfram rekstrarstjóri og þjálfari hjá handknattleiksdeild Fram.

„Ég verð áfram hérna sem rekstrarstjóri og þjálfari. Ég sagði það líka við strákana eftir síðasta leikinn að ég ætla ekkert að hverfa. Mér þykir mjög vænt um þennan hóp og vil áfram vinna með honum,“ segir Rúnar og bætir við:

„Eina breytingin verður að ég verð ekki skíthræddur á hverjum degi um að slíta eitthvað.“

Ákvörðunin um að hætta hefur í raun legið fyrir um nokkurra mánaða skeið, frá því fyrir áramót.

„Ég leyfði þessu bara að malla í rólegheitunum í staðinn fyrir að gefa eitthvað út. Fyrir utan það að ég er ekki nægilega athyglissjúkur til þess að vilja fá einhvern kveðjutúr eða slíkt kjaftæði,“ segir Rúnar léttur.

Hélt hann ætti stutt eftir fyrir þrettán árum

Kveðjustundin hefur því verið drjúg, þó tilkynningin hafi ekki farið út fyrr en í fyrradag. Margar minningar standa upp úr eftir langan atvinnumannaferil í Þýskalandi og Danmörku, Íslandsmeistaratitla með ÍBV og Fram og hundrað landsleiki.

„Maður hefur alveg orðið klökkur inn á milli, sitjandi einn með sjálfum sér í bílnum að hugsa um allt saman. Ég upplifi mig mjög lánsaman að ná 21 ári í meistaraflokki. Ég sleit krossband tvisvar sinnum þegar ég er 24 og 25 ára,“

„Satt best að segja, þegar ég sleit krossband í annað sinn, var ég ekki viss um að ég myndi endast eitthvað. Ég hélt að klukkan mín væri komin langt á veg. Að ég sé enn skytta 38 ára í endalausum hamagangi að spila, ég er gríðarlega stoltur af því og þakklátur að þetta skyldi nú allt saman tolla saman,“ segir Rúnar.

Einar eigi mikið í ferlinum

Það var þá dýrmætt að vinna tvöfalt með uppeldisfélaginu síðasta vor með Einar Jónsson, þjálfara liðsins, sér við hlið.

„Hann þjálfar mig í fyrsta sinn þegar ég er 13 ára, árið 2002 held ég. Hann kenndi mér hluti sem ég hefði að ég held aldrei lært sjálfur einn míns liðs. Hann er mikilvægasta persónan á mínum handboltaferli,“ segir Rúnar.

Fleira kemur fram í viðtalinu við Rúnar sem má sjá í heild í spilaranum að neðan. Einnig má hlusta á viðtalið í hlaðvarpsspilaranum að ofan, sem og á öllum helstu hlaðvarpsveitum.