Haf­dísi blöskraði valið: „Konur sem fá ekki blómin sem þær eiga skilið“

Í myndbandinu bendir Hafdís á sig og liðsfélaga sína í handboltaliði Vals og skrifar: „Minn íþróttamaður Vals 2025“, sýnilega ósátt við að engin þeirra skyldi verða fyrir valinu.

Hafdís hefur varið mark Vals síðustu þrjú ár og var í lykilhlutverki á síðasta ári þegar liðið skráði nýjan kafla í íþróttasögu Íslendinga með því að verða Evrópubikarmeistari kvenna í handbolta. Valskonur urðu jafnframt Íslandsmeistarar þriðja árið í röð í fyrra sem og deildarmeistarar, og voru þær valdar „lið ársins“ af Samtökum íþróttafréttamanna um áramótin.

Það varð þó engin úr kvennaliði Vals í handbolta fyrir valinu þegar dómnefnd félagsins valdi íþróttamann Vals árið 2025.

Danski markahrókurinn Patrick Pedersen, framherji karlaliðs Vals í fótbolta, hlaut nefnilega heiðurinn eftir að hafa meðal annars afrekað það að slá metið yfir flest mörk í efstu deild á Íslandi, en þar hefur hann samtals skorað 134 mörk fyrir Val. Í fyrra hafði hann náð að skora 18 mörk í 19 deildarleikjum áður en hann varð fyrir því óláni að slíta hásin í tapinu gegn Vestra í úrslitaleik Mjólkurbikarsins.

Íþróttamaður Vals hefur verið valinn frá árinu 1992 þegar Halldór Einarsson, stofnandi Henson, kom hefðinni á og gaf bikar. 

Síðan þá hafa 14 handboltamenn hlotið nafnbótina íþróttamaður Vals, 13 fótboltamenn og 3 körfuboltamenn, og sumir oftar en einu sinni. Alls hefur karlmaður 19 sinnum orðið fyrir valinu en 14 sinnum kvenmaður.