Þórir: Við lærðum bara af fyrsta leiknum

„Bara frábær leikur. Mikið fram og til baka“, sagði Þórir þegar hann hitti blaðamann eftir leik. 

„Mér fannst við gera vel í fyrri hálfleik og náðum að byrja seinni hálfleikinn vel en svo komust þeir á sprett. Sem betur fer fór þetta ekki eins og í fyrsta leiknum og við náðum að halda okkur rólegum og klára þennan leik.“

Þar vísaði Þórir til þess að Stjarnan vann þriðja leikhlutann í fyrsta leiknum 24-9. Þórir var spurður að því hvað hafi orðið til þess að KR hafi náð að halda ró sinni í þetta sinn.

„Við lærðum bara af fyrsta leiknum. Svo bara stuðningurinn í stúkunni var geggjaður og við nærumst virkilega vel á því. Svo bara hörkuleikur í lokin og sem betur fer náðum við að klára þetta.“

Það er greinilega mikill þorsti í úrslitakeppnina í Vesturbæ Reykjavíkur því stemmningin í húsinu var frábær en það eru fjögur ár síðan KR var á þessu stigi síðast.

„Maður er búinn að bíða eftir þessari tilfinningu í langan tíma og ljósin fóru af í byrjun leiks og maður gat ekki beðið eftir að byrja leikinn. Virkilega ánægður með að jafna metin en nú þurfum við að ná okkur niður og undirbúa okkur fyrir leik þrjú.“

Þórir var að lokum spurður að því hvort KR væru komnir með lykilinn að Stjörnunni.

„Nei, þetta eru tvö hörkulið og þessi sería fer bara eins og hún fer en ég held að bæði lið munu gera allt sem þau geta til að koma út á toppnum.“