Dagskráin: Von á dramatík í Meistaradeild og úrslitakeppni

Óskar Ófeigur Jónsson skrifar 15. apríl 2026 06:01

Kristófer Acox og félagar í Val geta tryggt sig áfram í Keflavík í kvöld. Vísir/Vilhelm

Það eru beinar útsendingar á sportstöðvunum í dag og kvöld eins og vanalega á miðvikudögum.

Nú er komið að úrslitastundu í átta liða úrslitum Meistaradeildar Evrópu en þá fara fram seinni leikirnir í tveimur seinni viðureignunum fjórum.

Bayern München og Arsenal unnu bæði fyrri leikina á útivelli og eru því í góðum málum fyrir leikina í kvöld. Bayern München vann 2-1 sigur á Real Madrid og fær sigursælasta lið Meistaradeildarinnar í heimsókn.

Það lítur út fyrir að pressan sé að fara með Arsenal-menn en þeir unnu 1-0 sigur á Sporting í fyrri leiknum og fá portúgalska félagið í heimsókn á Emirates í kvöld.

Upphitun fyrir leiki kvöldsins hefst klukkan 18.30 og eftir leikinn munu Meistaradeildarmörkin gera allt kvöldið upp eða frá klukkan 21.00. Það gæti auðvitað breyst eitthvað ef framlengingar fara að flækja málið.

Valsmenn geta tryggt sér sæti í undanúrslitum Bónusdeildar karla í körfubolta en þeir hafa unnið tvo leiki í röð á móti Keflavík og komast áfram með sigri í Keflavík í kvöld. Valsmenn unnu á flautukörfu í síðasta leik og Keflvíkingar ætla að hefna fyrir það og tryggja sér oddaleik.

Bónus Körfuboltakvöld verður á staðnum í Keflavík og mun gera upp leikinn sem og leikina í gærkvöldi eftir að leik lýkur í Blue-höllinni í Keflavík.

Hér fyrir neðan má sjá yfirlit yfir beinar útsendingar á sportstöðvunum í dag.

Sýn Sport

Klukkan 18.30 hefst upphitun fyrir leiki kvöldsins í Meistaradeildinni.

Klukkan 18.50 hefst bein útsending frá leik Bayern München og Real Madrid í átta liða úrslitum Meistaradeildar Evrópu í fótbolta.

Klukkan 21.00 hefjast Meistaradeildarmörkin þar sem farið verður yfir mörkin í leikjum kvöldsins í Meistaradeildinni.

SÝN Sport Ísland

Klukkan 19.00 hefst bein útsending frá fjórða leik Keflavíkur og Vals í átta liða úrslitum í úrslitakeppni Bónusdeildar karla í körfubolta.

Klukkan 21.15 hefst Bónus Körfuboltakvöld þar sem farið verður yfir leiki kvöldsins sem og alla leiki fjögurra í átta liða úrslitum úrslitakeppni Bónusdeildar karla í körfubolta.