Suður-Grænland fær nýjan alþjóðaflugvöll

Í kvöldfréttum Sýnar mátti sjá myndir teknar úr flugmælingavél Isavia en íslenskir flugprófanamenn hafa í vetur unnið að því að taka út flugleiðsögutæki og aðflugsferla fyrir nýju flugbrautina við Qaqortoq, sem er 1.500 metra löng.

Samhliða hafa flugvallayfirvöld á Grænlandi undirbúið opnun vallarins með þjálfun starfsmanna. Meðal annars hafa verið haldnar æfingar í afgreiðslu flugfarþega og neyðarviðbrögðum slökkviliðs, sjúkraflutningamanna og lögreglu.

Þótt formleg opnun sé á morgun lenti fyrsta flugvélin í gær en það var Dash 8 Q200-vél frá Air Greenland. Þetta telst þó tilraunalending en engu að síður fjölmenntu bæjarbúar til að fylgjast með enda hafa þeir lengi beðið eftir því að fá flugvöll.

Nýi völlurinn við Qaqortoq mun taka yfir hlutverk Narsarsuaq sem alþjóðaflugvöllur og aðalflugvöllur Suður-Grænlands. Um leið verður Narsarsuaq-velli lokað en hann er sá flugvöllur Grænlands sem Íslendingar hafa tengst hvað mest í gegnum tíðina. Meðal starfsmanna hans er Ingibjörg Gísladóttir.

„Það verður mikill söknuður af þessum flugvelli, það er alveg rétt,“ sagði Ingibjörg í fyrravetur, og ekki síst vegna tengsla vallarins við Ísland.

„Og ég held að mögulega fyrsta flug frá Íslandi til Grænlands hafi verið hingað. Þannig að þetta er löng saga sem er hingað,“ sagði Ingibjörg en þetta fyrsta flug íslensks flugfélags vegna verkefnis á Grænlandi gæti hafa verið árið 1949, eða fyrir 77 árum.

Á safni í Narsarsuaq má fræðast um fjölbreytt verkefni sem Íslendingar sinntu þar, eins og ískönnunarflugi og áætlunarflugi. Þá hefur völlurinn gjarnan verið síðasti viðkomustaður smærri flugvéla á leið frá Ameríku til Íslands.

Um leið er nýja flugvellinum fagnað í Qaqortoq. Þar er málmleitarfélagið Amaroq með starfsstöð og svona lýsti forstjórinn Eldur Ólafsson breytingunni í fyrra:

„Þessi nýi flugvöllur mun stytta tímann fyrir starfsfólkið okkar að koma inn. Hann mun stytta tímann til að koma fólki inn og út. Það á að vera auðveldara að lenda þarna, miðað við þar sem flugvöllurinn er núna. Það verður hægt að koma stærri flugvélum inn.

Þannig að þetta mun hafa alveg gígantísk áhrif. Ekki bara fyrir okkar starfsemi heldur alla starfsemi á Suður-Grænlandi, túrisma og annað,“ sagði Eldur.