Arion banki og Kvika blása af samrunann

Oddur Ævar Gunnarsson skrifar 15. apríl 2026 18:47

Arion banki hefur kynnt nýtt lánaframboð. Vísir/Vilhelm

Ekki verður af sameiningu Arion banka og Kviku. Þetta kemur fram í tilkynningu Arion banka þar sem ástæðan er rakin til afstöðu Samkeppniseftirlitsins.

Í tilkynningunni segir að forviðræðum Kviku banka og Arion banka við Samkeppniseftirlitið vegna samrunaáforma félaganna sé lokið. Í dag hafi fulltrúar Kviku banka og Arion banka fundað með fulltrúum Samkeppniseftirlitsins sem kynntu afstöðu sína að loknum forviðræðum.

„Í ljósi þeirrar afstöðu Samkeppniseftirlitsins sem fram kom á fundinum telja stjórnir Kviku banka og Arion banka að ekki geti orðið af samruna félaganna. Stjórnir bankanna hafa því fallið frá samrunaáformum sem upplýst var um í tilkynningu til kauphallar þann 6. júlí 2025,“ segir í tilkynningunni.

Afstaða Samkeppniseftirlitsins komi á óvart og séu vonbrigði

„Samrunaviðræður Arion banka og Kviku banka gengu vel og sáu báðir aðilar mikil tækifæri til að auka skilvirkni í íslensku fjármálakerfi viðskiptavinum og hluthöfum til góðs. Vil ég þakka Kviku banka ánægjulegt samstarf síðustu mánuði,“ er haft eftir Benedikti Gíslasyni bankastjóra Arion banka.

„Mikil og vönduð vinna var lögð í forviðræður við Samkeppniseftirlitið og lögðu félögin fram margvíslegar lausnir til að stuðla að virkri og öflugri samkeppni á fjármálamarkaði. Afstaða Samkeppniseftirlitsins til samruna félaganna kemur því nokkuð á óvart og eru vonbrigði.“

Er ennfremur haft eftir Benedikti að Arion banki hafi á undanförnum árum verið í forystu á íslenskum fjármálamarkaði með fjölbreyttri og snjallri fjármálaþjónustu. Bankinn muni óhikað halda áfram á þeirri braut og þróa og efla þjónustu með þarfir viðskiptavina að leiðarljósi.

Arion banki Kvika banki Fjármálafyrirtæki Samkeppnismál

Tengdar fréttir

Ekki að vænta niðurstöðu um framhald samrunaviðræðna fyrr en eftir mánuð

Eftir að hafa átt í margra mánaða forviðræðum við Samkeppniseftirlitið voru væntingar um það myndi draga til tíðinda í samrunaferli Arion banka og Kviku á komandi dögum. Enn verður hins vegar einhver bið á því en stjórnendur bankanna búast núna við að myndin skýrist um hvort haldið verði áfram með samrunann um miðjan næsta mánuð.

7. apríl 2026 15:53

Samruni sem var „skrifaður í skýin“ þegar Arion hafði betur í slagnum um Kviku

Arion banki hafði betur í slagnum um að hefja samrunaviðræður við Kviku eftir að hafa hækkað verulega tilboð sitt frá fyrsta kasti, sem endurspeglar væntingar um þau miklu tækifæri og samlegð sem hægt sé að ná fram í sameinuðu félagi, en stjórnendur bankans telja sig geta náð viðskiptunum í gegn án mjög íþyngjandi skilyrða frá Samkeppniseftirlitinu. Á meðal helstu fjármálaráðgjafa Arion í viðræðunum er fyrrverandi forstjóri Kviku banka og þá er nú þegar er búið að ákveða hver verður bankastjóri sameinaðs félags.

15. júlí 2025 11:44

Mest lesið

Fleiri fréttir