Þór Ak. - Fram 1-0 | Aron Birkir hélt markinu hreinu í vígsluleiknum

Þór Akureyri vann 1-0 sigur gegn Fram í 3. umferð Bestu deildar karla. Sebastian Haugland skoraði eina mark leiksins í upphafi seinni hálfleiks.

Fram fékk fleiri hættuleg færi í þessum leik en það var Þór sem fagnaði sigri, þökk sé Sebastian Haugland sem skoraði með góðu skoti í upphafi seinni hálfleiks.

Aron Birkir Stefánsson átti nokkrar góðar markvörslur til að halda marki Þórs hreinu.

Eftir sigur dagsins hefur Þór safnað sex stigum, eftir sigur gegn Val í fyrstu umferð en tap gegn KR í annarri umferð. Fram þurfti hins vegar að sætta sig við fyrsta tap sumarsins, eftir jafntefli gegn ÍA og sigur gegn Keflavík í fyrstu leikjunum.

Fram byrjaði betur gegn taugaveikluðu Þórsliði 

Framarar byrjuðu leikinn mun betur og átti Ægir Jarl Jónasson skot framhjá eftir aðeins örfáar mínútur. Stuttu síðar átti Atli Þór Jónasson skalla framhjá úr mjög góðu færi á fjærstönginni.

Það virtist einhver taugatitringur vera í Þórsliðinu sem náði engum takti í upphafi leiks og var mikið um langa bolta fram völlinn á meðan Framar þrýstu heimamönnum niður völlinn og fengu fín færi út úr því sem nýttust þó ekki.

Meira sjálfstraust þegar líða fór á leikinn 

Eftir um 25 mínútna leik voru Þórsarar búnir að hrista af sér mesta hrollinn og leikur liðsins batnaði til muna og leikmenn virtust hafa meira sjálfstraust til að halda boltanum innan liðsins.

Staðan í hálfleik markalaus.

Síðari hálfleikur fór kröftuglega af stað og var Vuk Oksar Dimitrijevic nálægt því að skora eftir aðeins nokkrar sekúndur en boltinn rétt yfir.

Haugland skoraði með hörkuskot 

Á 49. mínútu voru Þórsarar þolinmóðir og byggðu upp góða sókn sem endaði með því að Atli Sigurjónsson kom boltanum á Christian Jakobsen sem renndi boltanum til hægri á Sebastian Haugland sem var staðsettur rétt fyrir utan teiginn hægra megin og lét vaða á markið og boltinn söng í netinu, uppi í fjærhorninu. Frábært mark og Þór komið í forystu.

Eftir markið færðist leikurinn aftur meira yfir til Framara, sem sóttu stíft og herjuðu á heimamenn en varnarmúr þeirra var sterkur með Yann Affi og Ásbjörn Líndal í hjarta varnarinnar sem vörðust vel eins og allt liðið og hentu sér fyrir hvort skotið á fætur öðru.

Aron Birkir með magnaða markvörslu 

Á 83. mínútu átti Fred, sem kom inn á sem varamaður, frábært skot fyrir utan teig sem stefndi rakleiðis upp í fjærhornið en Aron Birkir tók á honum stóra sínum og átti magnaða markvörslu og neitaði þar Fred um frábært mark.

Lokamínútur leiksins voru spennuþrungnar og Framamar sóttu stíft í leit að jöfnunarmarki en Þórsarar stóðust prófið og sigldu stigunum þremur heim við mikinn fögnuð þegar loka flautið gall.

Atvik leiksins

Verð að nefna tvö atvik hér; markið sem Sebastian Haugland skorar, hans fyrsta mark fyrir Þór og jafnframt fyrsta markið á nýja vellinum og það var af dýrari gerðinni.

Einnig nefni ég vörsluna hjá Aroni Birki í marki Þórs undir lokin. Frábær varsla á frábæru skoti frá Fred fyrir utan sem var á leiðinni í markið og þá hefði staðan verið jöfn.

Stjörnur og skúrkar

Varnarlína Þórs eins og hún leggur sig var frábær, og þá sérstaklega Aron Birkir í markinu ásamt Ásbirni Líndal og Yann Affi í hafsentastöðunum sem henti sér fyrir fjölmörg skot á ögurstundu í dag.

Bjarni Guðjón Brynjólfsson átti góðan leik á miðjunni og sýndi hversu mikilvægur hann er liðinu.

Dómarinn

Gunnar Freyr Róbertsson hélt á flautunni í Þorpinu í dag sem getur verið krefjandi en hann komst vel frá sínu í dag. Bæði lið vildu fá víti í fyrri hálfleik en erfitt að segja til um það nema rýna vel í það í sjónvarpsútsendingu.

Stemning og umgjörð

Þórsarar vígðu nýjan völl í dag, VÍS-völlinn, og mætti fullt af fólki í frábæru veðri á völlinn og var stemningin algjörlega til fyrirmyndar. Þetta var fyrsti heimaleikur Þórs í efstu deild í tólf ár og því mikið um að vera og pallurinn í Hamri iðaði enn af lífi hálftíma eftir leik þegar undirritaður hélt heim á leið.

„Hjarta og orka sem skilaði þessu“

„Bara mjög góðar. Geggjaður sigur, þurftum að hafa rosalega mikið fyrir honum og vissum það og vorum bara tilbúnir í það. Ég er mjög ánægður með liðið mitt“, sagði Sigurður Heiðar Höskuldsson, þjálfari Þórs, aðspurður hvernig tilfinningarnar væru eftir 1-0 sigur gegn Fram á heimavelli í þriðju umferð Bestu deildar karla en Þórsarar hafa nú sex stig eftir þrjár umferðir.

Fram fékk fjölmörg færi til að skora í dag en Þórsarar vörðust gífurlega vel.

„Aron (Birkir Stefánsson) átti þarna eina eða tvær vörslur og svo vorum við bara fyrir þeim, vorum margir inni í teignum að verjast þeim. Þeir eru að henda mikið af fyrirgjöfum og mikið að fylla boxið af mörgum mönnum. Mér fannst við eiga mjög vel við það og ég hefði viljað sjá okkur hreinsa þetta aðeins fastar í burtu þegar þurfti en bara hjarta og orka sem að skilaði þessu. Það voru svona tvö augnablik þar sem ég var smeykur um að þeir væru að fara skora en annars var þetta bara flott sko.“

Sigurður segir að auðvitað sé margt hægt að bæta en er gríðarlega ánægður með sigurinn.

„Þú vilt alltaf bæta margt, mér fannst við svolítið svona ragir fyrstu fimmtán, áttum erfitt með að komast út. Þeir svona stuðuðu okkur aðeins með tempóinu í pressunni en svo fannst mér við flottir og svo fannst mér þetta bara svona 50/50 leikur eftir fyrstu fimmtán, tuttugu þá fannst mér við mjög góðir og svo í seinni hálfleik klárum við þetta og skorum þetta mark og svona ekki alveg nógu góðir í að vera vinna leiki og vera aðeins svalir á því og spila aðeins meira. Þetta var erfitt og þeir náttúrulega með reynslumikið lið og gott lið og þeir keyrðu á okkur og bara þurftum að þjást og gerðum það svakalega vel. Hrikalega ánægður með liðið.“

Fyrsti heimaleikurinn

Leikurinn var fyrsti heimaleikur Þórs í tólf ár í efstu deild og það á nýjum velli í þokkabót og dagurinn því stór fyrir Þórsara.

„Já bara frábært. Fyrsti leikurinn í deildinni þá fórum við á Hlíðarenda og unnum og svo núna fyrsti heimaleikurinn og við yfirleitt gerum vel þegar við höfum mannskapinn með okkur og í svona stórum leikjum og stórum augnablikum þá höfum við verið flottir þannig það mun reynast okkur vel í sumar að einhvern veginn vera tilbúnir í þessi stóru augnablik í tímabilinu.“

Þrjár breytingar voru á byrjunarliði Þórs í dag og einnig gerði Sigurður þrefalda skiptingu á 64. mínútu og því hópurinn nýttur vel.

„Já bara stórkostlegt. Það var stefnan að reyna vera með svolítið breiðan og góðan hóp og hópurinn hefur reynst okkur alveg svakalega vel og góðar innkomur og náðum að rúlla aðeins á liðinu í dag og gefa fleiri mönnum tækifæri í byrjunarliðinu og það held ég að hafi heppnast bara hrikalega vel og þeir sem komu inn á og byrjuðu voru frábærir. Bjarni Guðjón (Brynjólfsson) var geggjaður og svo var náttúrulega varnarlínan mín með tvo unga sem voru stórkostlegir í dag og bara gæti ekki hrósað þeim tveimur meira“, sagði Sigurður að lokum og þar líklega við Ásbjörn Líndal Arnarson og Sverrir Pál Ingason sem eru fæddir 2008 og því einungis á átjánda a