Gengi Alvotech tekur kipp

Á föstudag náði gengi félagsins sögulegri lægð, þegar eitt hlutabréf í félaginu fékkst keypt á 388 krónur. Í fyrstu viðskiptum í morgun tók gengið að hækka hægt og rólega og þegar fréttin er skrifuð stendur það í 423 krónum, sem er níu prósent hærra en fyrir opnun markaðar.

Fyrir opnunina í morgun tilkynnti félagið að í kjölfar loka úttektar FDA standi til að senda aftur umsóknir um markaðsleyfi í Bandaríkjunum fyrir ný hliðstæðulyf á þessum ársfjórðungi. Það verði gert um leið og nauðsynleg gögn liggja fyrir.

Í yfirlýsingu félagsins segir því hafi verið afhentar athugasemdir eftir úttektina. Skjótt verði brugðist við þeim og að þær kalli ekki á veigamiklar breytingar eða viðbrögð.

Forsvarsmenn fyrirtækisins geri ráð fyrir að umsóknir verði samþykktar á þessu ári en umsóknum um markaðsleyfi var hafnað í fyrra eftir sambærilega úttekt.