Bolton flaug upp en Benoný og fé­lagar sátu eftir

Bolton komst snemma í 1-0 en Adama Sidibeh jafnaði metin á 29. mínútu, eftir að hafa einnig skorað mark sem dæmt var af vegna brots.

Staðan var enn 1-1 þar til á 64. mínútu þegar framherjinn Kyle Wootton, sem leyst hafði stöðu miðvarðar vegna forfalla, varð fyrir því óláni að skora slysalegt sjálfsmark og koma Bolton yfir á nýjan leik.

Benoný var í kjölfarið skipt inn á en Stockport tókst ekki að jafna og Sam Dalby jók muninn í 3-1 á 81. mínútu áður en Rúben Rodrigues skoraði fjórða mark Bolton í lokin, sitt annað mark í leiknum, og gladdi eflaust Jón Daða Böðvarsson og fleiri Íslendinga sem spilað hafa með liðinu.