Hjalla­stefnan fær loksins hús­næði

Í framkvæmdunum verður lögð áhersla á að lágmarka kolefnisfótspor og verður notast við forsmíðaðar húseiningar sem flýta munu uppbyggingu. Vinna við gerð deiliskipulags stendur yfir og stefnt er að því að klára það ferli fyrri hluta árs 2027.

Í tilkynningu kemur fram að með þessu sé bundið enda á tuttugu ára húsnæðisvanda leikskólans Öskju og Barnaskóla Hjallastefnunnar í Reykjavík. Þá segir einnig að skóla- og frístundasvið Reykjavíkurborgar hafi sýnt verkefninu mikinn áhuga og án stuðnings borgarinnar væri ekki hægt að fagna þessum áfanga.

Skólarnir störfuðu lengst af, frá árinu 2010, í húsnæði að Nauthólsvegi 89. Húsið stóð á lóð í eigu Háskólans í Reykjavík sem leysti lóðina aftur til sín og þurfti starfsemin frá að hverfa eftir að skóla var slitið vorið 2022. Starfsemin var frá þeim tíma dreifð og í leiguhúsnæði. Var miðstig skólans meðal annars um tíma kennt í húsnæði skátafélagsins Landnema.

Hjallastefnan er risi á sviði sjálfstæðs reksturs leik- og grunnskóla á Íslandi. Félagið er með samninga við tíu sveitarfélög og veitir um 550 manns atvinnu. Nemendurnir eru um 1650 í tólf leikskólum og þremur grunnskólum.

Uppbyggingin er hluti af lífsgæðakjarna sem Reitir munu reisa við Nauthólsveg. Mun kjarninn einnig innihalda hundrað og fimmtíu íbúðir ætlaðar sextíu ára og eldri, auk verslunar og þjónustu. Segir í tilkynningunni að hugmyndafræðin komi frá Hollandi og byggi á þveraldursbúsetu. Garðar, yfirbyggð útirými og samnýting svæða dragi úr félagslegri einangrun og bæti lífsgæði.