Fyrsti dagur MÍ: Öruggt hjá Sindra og fimm­tán ára vann fjögur hundrað metra hlaupið

Öllu hefur verið tjaldað til í Skógarselinu vegna hundraðasta Meistaramótsins. Heiðursgestum er boðið að flytja ávörp, sögusýning hefur verið sett upp og keppendalistinn í ár þykir einkar sterkur.

Hanna María Petersdóttir úr Fjölni hrósaði sigri í stangarstökki kvenna. Hún lyfti sér yfir 3,30 metra. Katrín Tinna Pétursdóttir varð önnur (3,20 metrar) og Eyrún Anna Höskuldsdóttir þriðja (3,10 metrar).

FH-ingurinn Sindri Hrafn Guðmundsson vann afar öruggan sigur í spjótkasti karla. Lengsta kast hans var 80,80 metrar. Í 2. sæti varð Garðar Atli Gestsson með 65,09 metra kast. Bergur Sigurlinni Sigurðsson fékk svo bronsið með kasti upp á 55,73 metra.

Munurinn var minni í kvennaflokki þar sem Arndís Diljá Óskarsdóttir úr FH stóð uppi sem sigurvegari. Hún kastaði spjótinu 48,92 metra. Bryndís Embla Einarsdóttir varð önnur (45,08 metrar) og María Rún Gunnlaugsdóttir þriðja (40,81 metri).

Í fimmtán hundruð metra hlaupi kvenna kom Embla Margrét Hreimsdóttir úr FH fyrst í mark á 4:31,36 mínútum. Helga Lilja Maack varð önnur á 4:38,21 og Íris Anna Skúladóttir þriðja á 4:45,52.

Gestur Daníelsson úr FH hrósaði sigri í fimmtán hundruð metra hlaupi karla. Hann hljóp á 3:59,54 sem er besti tími hans í greininni. Sindri Karl Sigurjónsson lenti í 2. sæti (4:03,56) og Jökull Bjarkason því þriðja (4:04,62).

Hin fimmtán ára Eyrún Svala Gústavsdóttir úr Breiðabliki varð Íslandsmeistari í fjögur hundruð metra hlaupi kvenna. Hún kom í mark á 58,24 sekúndum sem er hennar besti árangur í greininni. Klara Sif Aronsdóttir varð önnur (1:00,30) og Sara Gunnlaugsdóttir tók bronsið (1:01,42).

Í fjögur hundruð metra hlaupi karla vann Fjölnismaðurinn Kjartan Óli Bjarnason sigur. Hann hljóp á 48,47 sekúndum. Tómas Orri Gíslason varð annar á 49,25 sekúndum og þar á eftir kom Gabríel Glói Freysson á 49,92 sekúndum.

Keppendur FH hafa náð í flest stig (16) á Meistaramótinu en þar á eftir kemur Fjölnir með níu stig.