Bæta við sex nýjum Airbus-vélum

Vélarnar verða teknar á leigu hjá flugvélaleigusalanum Aircastle. Áður hafði verið tilkynnt um fjórar flugvélar af sömu tegund frá leigusalanum AviLease sem bætast við flotann á næsta ári, vorið 2027.

Félagið rekur þegar sjö Airbus-vélar og von er á þremur A321LR-vélum, brakandi ferskum úr verksmiðjum Airbus-flugvélaframleiðandans í vetur. „LR“ í nafni vélanna stendur fyrir „long range“ og bjóða vélarnar því upp á aukna drægni miðað við A320neo-vélarnar sem minnst var á í upphafi fréttarinnar. 

Munurinn í drægni er um 500 sjómílur eða tæpir þúsund kílómetrar. A321neo-vélar munu geta þjónað áfangastöðum í Miðvesturríkjum Bandaríkjanna og áfangastöðum í Bandaríkjunum norðaustanverðum auðveldlega. Á sama tíma munu A321LR-vélar með lengri drægni sinni mögulega geta opnað á nýja áfangastaði, líkt og Phoenix í Arizona, en flugleiðin þangað er um 6400 kílómetrar. 

Þegar félagið bætti fyrst við sig A321LR-vél fyrir tæplega tveimur árum bættist Miami við á heimskorti félagsins en ekki hefur verið tilkynnt um fleiri fjarlæga áfangastaði síðan þá.

Vinna staðfastlega að endurnýjun flotans

Icelandair heldur með þessu áfram endurnýjun flugflota síns. Tilkynnt hefur verið að félagið muni leggja flugvélatýpurnar Boeing 757 og 767 endanlega af í janúar 2027. Félagið hefur síðustu ár haft nokkrar 767 vélar í rekstri, sem eru litlar breiðþotur, en það verður sannarlega sögulegt þegar félagið leggur síðustu 757 vélinni. Vélarnar hafa síðustu áratugi verið hryggjarstykkið í flota félagsins en framleiðslu þeirra var hætt árið 2004. 

Nýju vélarnar munu gera Icelandair kleift að bjóða upp á meiri þægindi fyrir farþega með betri hljóðvist og loftgæðum. Þá eru þær eyðslugrennri þegar kemur að þotueldsneyti sem hefur jákvæð áhrif á efnahagsreikning og kolefnisfótspor félagsins.

„Við höldum áfram að fjárfesta í umfangsmikilli endurnýjun flugflotans og fögnum nýju samstarfi við Aircastle og AviLease. Á næsta ári munum við ná þeim merka áfanga að allt farþegaflug félagsins verður flogið á nýrri kynslóð flugvéla sem nýta allt að 30% minna eldsneyti á hvert sæti en eldri tegundir. Jafnframt styður flotaendurnýjunin við markmið okkar um að efla leiðakerfið, einfalda flotann og veita viðskiptavinum framúrskarandi þjónustu og ferðaupplifun,“ er haft eftir Boga Nils Bogasyni, forstjóra Icelandair, í tilkynningu.