Ár­menningar semja við fyrrum Íslandsmeistara

Íslenskir körfuboltaunnendur þekkja Diamond Battles vel en hún lék með Haukum tímabilið 2024/2025 og varð Íslandsmeistari með liðinu.

Battles skoraði að meðaltali 15,9 stig, tók 4,9 fráköst, gaf 3,4 stoðsendingar og stal boltanum 2,6 sinnum í leik með Haukum í deildarkeppninni en í úrslitakeppninni spilaði hún enn betur þegar hún skoraði 17 stig að meðaltali, tók 5,0 fráköst og gaf 4,5 stoðsendingar.

Hún átti stóran þátt í Íslandsmeistaratitli Hauka og var meðal annars með 20 stig og 7 stoðsendingar í oddaleiknum um titilinn.

„Með komu Diamond Battles bætist reynslumikill og sigursæll leikmaður í leikmannahóp Ármanns. Félagið lítur á komu hennar sem mikilvægt skref í áframhaldandi uppbyggingu liðsins og undirstrikar metnað sinn fyrir komandi tímabil í Bónus deildinni,“ segir í frétt á miðlum Ármanns.

Battles lék á sínum tíma með University of Central Florida og University of Georgia í NCAA-deildinni þar sem hún hlaut meðal annars nafnbótina varnarmaður ársins í AAC-deildinni og var valin í varnarlið SEC-deildarinnar. Hún hefur síðan leikið atvinnumennsku í Evrópu og fest sig í sessi sem öflugur bakvörður.