Þakkar FIFA fyrir greiðslu sem birtist allt í einu eftir gagn­rýnina

„Þakkir til stjórnar FIFA fyrir að greiða skyndilega peningana sem þeir skulduðu leikmönnum okkar og starfsfólki fyrir að komast í úrslitaleikinn í Arabíska bikarnum í desember síðastliðnum. Peninga sem við hefðum átt að fá fyrir átta mánuðum,“ skrifaði Ali prins Al Hussein á samfélagsmiðla sína.

Ali Hussein, sem áður var varaforseti FIFA, sakaði Infantino um fjárkúgun fyrr í vikunni en samkvæmt honum vildi Infantino fá stuðningsyfirlýsingu í forsetastólinn áður en hann greiddi það sem FIFA skuldaði Jórdönum.

Ali Hussein hefur ekki breytt um skoðun þótt peningarnir séu loksins komnir inn á reikninginn.

„Það breytir þó ekki þeim alvarlegu áhyggjum sem við í fótboltaheiminum höfum af stjórn FIFA, né því sem knattspyrnusamband okkar hefur áður orðið fyrir,“ skrifar Al Hussein á X-síðu sína, þar sem hann segir að þeir muni áfram ekki styðja Infantino.