Táningarnir sem gætu slegið í gegn í ensku úr­vals­deildinni í vetur

Sá fyrsti sem er nefndur til sögunnar er leikmaður sem lét til sín taka á síðasta tímabili, Arsenal-maðurinn Max Dowman. Hann varð yngsti leikmaðurinn í sögu ensku úrvalsdeildarinnar til að skora (sextán ára og 73 daga gamall) þegar hann gulltryggði sigur Arsenal á Everton.

Alls lék Dowman, sem verður ekki sautján ára fyrr en á gamlársdag, þrettán leiki í öllum keppnum fyrir Arsenal á síðasta tímabili.

Táningar Liverpool og Manchester United eru einnig taldir geta haft áhrif á gang mála í ensku úrvalsdeildinni í vetur. Þetta eru þeir Trey Nyoni og Shea Lacey. 

Nyoni, sem er nítján ára miðjumaður, kom við sögu í sex leikjum með Liverpool á síðasta tímabili og lék alls fjórtán leiki í öllum keppnum. Lacey er sömuleiðis nítján ára en þessi kantmaður eða sóknarsinnaði miðjumaður lék þrjá deildarleiki á síðasta tímabili.

George Hemmings hjá Aston Villa, Veljko Milosavljevic hjá Bournemouth, Joel Drakes-Thomas hjá Crystal Palace og Harrison Armstrong hjá Everton eru einnig taldir geta slegið í gegn í vetur.

Upphafsleikur ensku úrvalsdeildarinnar fer fram á Emirates á föstudaginn en þar taka Englandsmeistarar Arsenal á móti nýliðum Coventry City.

Upphitunarþáttur Messunnar fyrir tímabilið í ensku úrvalsdeildinni verður sýndur á Sýn Sport klukkan 17:45 á morgun.