Forstjórarnir sem möluðu gull í fyrra

Árni Sæberg skrifar 18. ágúst 2026 13:41

Gunnar, Árni og Eldur voru launahæstir Íslendinga í fyrra. Vísir

Forstjórar landsins gerðu það gott í fyrra en fjórtán þeirra voru með meira en tíu milljónir króna á mánuði í útsvarsskyldar tekjur í fyrra. Sá launahæsti fékk rúmlega 46 milljónir króna á mánuði.

Líkt og greint var frá í dag er Árni Sigurðsson, aðstoðarforstjóri JBT Marel, skattakóngur ársins 2025, með 46 milljónir á mánuði. Rétt er að árétta að þar er um allar útsvarsskyldar tekjur að ræða og þær þurfa ekki að endurspegla föst laun Árna. Þetta kemur fram í Tekjublaði Frjálsrar verslunar, sem kom út í dag.

Þá má nefna að fjármagnstekjuskattur er tekinn út fyrir sviga í samantekt Frjálsrar verslunar og því er ekki loku fyrir það skotið að einhver annar en Árni hafi lagt mest til samneyslunnar í fyrra.

Samkvæmt Tekjublaðinu var Eldur Ólafsson, stofnandi og forstjóri Amaroq Minerals, næstlaunahæstur Íslendinga í fyrra, með 39,5 milljónir króna á mánuði. Þá hafi Gunnar Guðlaugsson, forstjóri Norðuráls, verið þriðji launahæstur með 33,5 milljónir króna á mánuði.

Hér að neðan má sjá lista yfir tuttugu launahæstu forstjóra landsins í fyrra og laun þeirra í þúsundum króna:

Árni Sigurðsson, aðstoðarforstjóri JPT Marel, 46.250
Eldur Ólafsson, forstjóri Amaroq Minerals, 39.520
Gunnar Guðlaugsson, forstjóri Norðuráls, 33.510
Grímur Karl Sæmundsen, forstjóri Bláa Lónsins, 19.423
Haraldur Líndal Pétursson, forstjóri Fagkaupa, 15.352
Orri Hauksson, stjórnarformaður First Water og fyrrverandi forstjóri Símans, 14.229
Auður Daníelsdóttir, forstjóri Dranga, 12.593
Ásgeir Helgi Reykfjörð Gylfason, forstjóri Skeljar, 12.529
Hjörtur Valdemar Erlendsson, forstjóri Hampiðjunnar, 12.369
Þorsteinn Kristjánsson, forstjóri Eskju, 11.928
Rannveig Rist, fyrrverandi forstjóri Rio Tinto á Íslandi, 11.275
Jóhann Ásgeir Baldurs, forstjóri Arctic Adventures, 10.590
Kári Stefánsson, fyrrverandi forstjóri Íslenskrar erfðagreiningar, 10.064
Jón Sigurðsson, forstjóri og stjórnarformaður Stoða, 10.028
Garðar Stefánsson, forstjóri Rapyd Europe, 9.524
Guðbrandur Sigurðsson, fyrrverandi framkvæmdastjóri Brynju leigufélags, 8.618
Egill Jóhannsson, forstjóri Brimborgar, 8.235
Guðjón Rúnarsson, framkvæmdastjóri og eigandi Kjarnavara, 7.948
Sigurgeir Guðlaugsson, framkvæmdastjóri Citalfort og fyrrverandi forstjóri Genís, 7.896
Andri Þór Guðmundsson, fyrrverandi forstjóri Ölgerðarinnar, 7.811

Tekjur Skattar, tollar og gjöld

Mest lesið

Fleiri fréttir