„Á­stæðan fyrir því að ég elska fót­bolta“

„Ef ég á að vera hreinskilinn heyrði ég ekki flaut dómarans. Ég þurfti að horfa á hann til að vita hvort ég mætti taka vítið,“ sagði Szoboszlai er hann var spurður út í aðdraganda jöfnunarmarksins.

„Ég æfði þetta mikið á undirbúningstímabilinu. Við fengum engin víti í leikjunum en ég vann í þessu á æfingasvæðinu. Við þurfum að taka það jákvæða úr þessum fyrsta leik og halda áfram.“

Szoboszlai segir að það hafi verið einstakt að standa við boltann og bíða þess að taka vítaspyrnuna.

„Rúmlega fimmtíu þúsund stuðningsmenn á vellinum á móti þér. Þú heyrir ekki þína eigin rödd. Þetta er ástæðan fyrir því að ég elska fótbolta og af hverju ég geri þetta,“ sagði ungverski miðjumaðurinn.

Engir auðveldir sigrar

„Það er alltaf erfitt að koma hingað og allir vita að stuðningsmenn þeirra eru ótrúlegir. Þeir eru með frábært lið og stjóra [Matthias Jaissle]. Hann er nýr en hann hefur sannað sig hjá mörgum öðrum liðum. En við vorum undirbúnir og þurftum að standa saman undir stjórn nýja stjórans. Við þurftum að vita hvað var að gerast í leiknum. Það var gott að koma til baka eftir að hafa lent 2-1 undir. En ef ég á að vera hreinskilinn áttum við að vinna. En svona er fótboltinn. Þú vinnur enga auðvelda sigra í ensku úrvalsdeildinni, sama á móti hverjum þú ert. Við þurfum að vera meðvitaðir um það og sjá um þetta í næsta leik.“

Leikurinn í dag var fyrsti keppnisleikur Liverpool undir stjórn Andonis Iraola. Hann tók við liðinu af Arne Slot í sumar. Szoboszlai var beðinn um að lýsa því hvernig væri að spila hjá Iraola.

„Við gefumst aldrei upp. Ég ábyrgist það. Við verðum alltaf að berjast, allan daginn, allar níutíu mínúturnar. Allir sem komu inn á settu mark sitt á leikinn. Við þurfum á öllum hópnum að halda og vera tilbúnir,“ sagði Szoboszlai.

Liverpool tekur á móti Nottingham Forest í 2. umferð ensku úrvalsdeildarinnar á laugardaginn kemur.