Hótelin fá ný nöfn

Í tilkynningu segir að Hilton Reykjavík muni áfram starfa undir alþjóðlega Hilton-vörumerkinu og verði jafnframt hluti af hótelsafni Íslandshótela.

„Hótel Reykjavík Askja verður hluti af Hótel Reykjavík vörumerkinu, sem fyrir eru Hótel Reykjavík Centrum, Hótel Reykjavík Grand og Hótel Reykjavík Saga.

Nöfnin marka nýjan kafla fyrir þessi rótgrónu hótel við upphaf rekstrar Íslandshótela. Rekstur hótelanna heldur áfram óslitinn og fyrirhugaðar endurbætur verða framkvæmdar í áföngum. Hilton Reykjavík er með 251 herbergi og Hótel Reykjavík Askja 220 herbergi. Reitir og Íslandshótel munu í samstarfi ráðast í endurbætur á hótelunum með það að markmiði að auka gæði og aðdráttarafl þeirra, þar á meðal með endurnýjun stórs hluta hótelherbergjanna.

Veitingastaður, ráðstefnuþjónusta, veislusalir, heilsulindir og spa aðstaða verður áfram starfrækt á báðum hótelum. Reykjavík Spa Hilton verður á Hilton Reykjavík og Reykjavík Spa Askja á Hótel Reykjavík Öskju. Starfsemi heilsulinda Íslandshótela verður sameinuð undir heitinu Reykjavík Spa og nýr sameiginlegur vefur mun þjóna þeim. Nöfn veitingastaða beggja hótela verða kynnt síðar,“ segir í tilkynningunni.

Um Íslandshótel segir að það reki nítján hótel með um 2.400 herbergjum víðs vegar um landið undir vörumerkjunum Fosshótel og Hótel Reykjavík. Kjarnastarfsemi félagsins er hótel- og veitingarekstur. Félagið á jafnframt stóran hluta þeirra fasteigna sem hýsa starfsemina.