Nemandi al­var­lega særður í stunguárás í skóla í Osló

Tilkynning um árásina í Kuben-framhaldsskólanum barst lögreglu klukkan 12:12 að staðartíma í morgun. Fimm mínútum síðar var ætlaður árásarmaður í haldi lögreglu, að sögn norska ríkisútvarpsins.

Fórnarlambið var með meðvitund en er alvarlega sært, að sögn norska blaðsins VG. Bæði árásarmaðurinn og fórnarlambið eru eldri táningar.

Lögreglan segir að margir nemendur hafi orðið vitni að árásinni. Myndbönd af árásinni eru sögð í dreifingu á samfélagsmiðlum.

Sjónarvottur segir VG að hann hafi séð árásarmanninn á hlaupum ásamt þremur öðrum með lögreglubíl á hælunum. Hann hafi reynt að fela sig en lögreglumenn hafi fundið hann fljótt.

Norska ríkisútvarpið segir Kuben-framhaldsskólann einn þann fjölmennasta í höfuðborginni.

Fréttin verður uppfærð.