Jón Dagur mætir sjóð­heitur í lands­leikina

Fullkomin byrjun tímabilsins heldur því áfram hjá Jóni Degi og félögum því Hertha Berlín er með fullt hús stig á toppi deildarinnar, eftir sex leiki.

Jón Dagur hefur fengið mikið hrós fyrir sinn þátt í þessari frábæru byrjun og náð að láta ljós sitt skína eftir að hafa átt erfitt uppdráttar á síðustu leiktíð.

Dresden komst yfir á tíundu mínútu í kvöld en Jón Dagur náði að jafna metin eftir tæplega hálftíma leik, með góðu skoti utan vítateigsbogans.

Það var svo komið fram á 80. mínútu þegar Jón Dagur skoraði sitt annað mark, sem reyndist sigurmark leiksins, og nú með enn fastara skoti við vítateigsbogann.

Jón Dagur hefur þar með þegar skorað þrjú mörk í deildinni á þessari leiktíð og átt eina stoðsendingu. Hann ætti því að mæta fullur sjálfstrausts til Reykjavíkur nú þegar við taka leikir með íslenska landsliðinu í Þjóðadeildinni. Þar er fyrsti leikur við Eistland á Laugardalsvelli á laugardaginn eftir viku.