Æfði með rúgbíliði í Frakk­landi á undir­búnings­tíma­bilinu

Wembanyama hefur fengið viðurnefnið „geimveran“ vegna bæði líkamsbyggingar og hæfileika en hann er yfir 220 sentimetrar á hæð og með vænghaf nálægt 244 sentimetrum. Á síðasta ári æfði hann með munkum í Kína til þess að læra af þeim bæði huglega og líkamlega.

Í sumar var hann í Frakklandi og æfði með Provence sem leikur í B-deildinni í rúgbí í Frakklandi. Þar var hann að tækla brúður og gera aðra hluti sem lið í rúgbí leggja áherslu á. Það sem hann lærði þó mest af var liðsandinn í liðinu en liðið einkenndist af ákveðnu bræðralagi.

Liðsfélagi Wembanyama hjá San Antonio Spurs, Harrison Barnes, var einnig með honum hjá rúgbíliðinu og ættu þeir að koma klárir inn í NBA tímabilið. Á meðan Wembanyama var í Frakklandi hélt hann öðruvísi körfuboltaviðburð í heimabæ sínum Le Chesnay. Þar var keppt í bæði skák og körfubolta og var því þessum íþróttum blandað saman.

Wembanyama og liðsfélagar hans í Spurs komust í úrslitaleik NBA-deildarinnar en liðið tapaði úrslitaseríunni fyrir New York Knicks. Það er því væntanlega markmið Wembanyama að ná skrefi lengra og sækja langþráðan NBA-titil.