Eldmóðurinn er mikill

Hvammstangi verður iðandi af lífi næstu daga. Við erum nú í óðaönn á ruslahaugunum að safna saman drasli til að kveikja í enda eldurinn einkenni hátíðarinnar," segir Kjartan Óli Ólafsson, einn af skipuleggjendum unglistarhátíðarinnar Eldur í Húnaþingi. "Þetta verður alveg geggjað, mikið af eldi enda ætlum við bæði að kveikja í höfninni og Borgarvirki." En bálkestir og brunar verða ekki aðeins í boði í Húnaþingi vestra því Kjartan segir ótal myndlistar- og ljósmyndasýningar verði í boði, útvarpsstöð starfrækt, tónleikar á hverju kvöldi, brekkusöngur og ljóðalestur. "Stefnan er að hafa hátíðina árlega og koma staðnum á kortið. Þetta er alveg frábær helgi þrátt fyrir að þetta sé ekki verslunarmannahelgin og lítið mál fyrir fólk að tjalda á svæðinu." Hugmyndin að hátíðinni kviknaði fyrir tveimur árum á fundi sem haldinn var um ungt fólk og atvinnu. "Einum hópnum datt þetta í hug til að sameina unga fólkið í bænum og vekja athygli á svæðinu. Við erum sjö manna hópur sem höldum utan um þetta núna en annars má segja að allt unga fólkið í Húnaþingi vestra standi fyrir þessu. Samheldnin hjá okkur er svo mikið að það nægir að hópa í liðið og þá er allt komið af stað," segir Kjartan og bætir því við að nafnið, "Eldur í Húnaþingi", vísi til eldmóðs unga fólksins á Hvammstanga.