Samstaða um sölu borgarfyrirtækja

Lagt er til að Þórólfur Árnason, borgarstjóri Reykjavíkur, feli þriggja manna verkefnisstjórn að móta tillögu að sölu hlutar Reykjavíkurborgar í Vélamiðstöð ehf. og Malbikunarstöðinni Höfða hf. og leggja fyrir borgarráð fyrir árslok. Tillaga þessa efnis var samþykkt á fundi Borgarráðs í gær. "Taka skal tillit til hagsmuna Reykjavíkurborgar sem aðaleiganda fyrirtækjanna tveggja og jafnframt sem eins helsta kaupanda þjónustu þeirra. Miðist tillögurnar við að tryggja sem virkasta samkeppni á starfssviði fyrirtækjanna," segir í tillögunni. Þórólfur Árnason borgarstjóri er sagður fagna einingu borgarstjórnarflokkanna um málið og segir söluna í takt við þá stefnu borgarinnar að selja rekstrareiningar sem betur eiga heima á almennum markaði.Hann segir söluna lið í ferli sem staðið hafi um árabil og vísar til sölu hlutar borgarinnar í Skýrr, Pípugerð Reykjavíkur, sameiningu veitufyrirtækja borgarinnar og stofnunar Félagsbústaða, auk hlutafélagavæðingar og sölu hlutafjár í Húsatryggingum Reykjavíkur.Borgarfulltrúar Sjálfstæðisflokksins fluttu tillögu um söluna á Vélamiðstöðinni og Malbikunarstöðinni Höfða á borgarstjórnarfundi fyrr í mánuðinum og var henni þá vísað til til borgarráðs.