Endurbæturnar langt fram úr áætlun

Endurbætur á Alþingi eru komnar langt fram úr áætlun. Forseti þingsins óttast að þær séu komnar yfir hundrað milljónir en áætlun gerði ráð fyrir sjötíu og fimm milljóna kostnaði við framkvæmdirnar.  Halldór Blöndal, forseti Alþingis, kynnti framkvæmdirnar á blaðamannafundi í morgun. Þetta er þriðji og næstsíðasti áfangi framkvæmdanna en í honum voru gólfplötur beggja megin forsalar brotnar upp, skipt um jarðveg og gólfin steypt á ný enda um verulegar rakaskemmdir að ræða. Gert var við jarðskjálftasprungur og gamlar raf- og vatnslagnir fjarlægðar. Endanlegur kostnaður liggur ekki fyrir en ljóst er að hann fer fram úr áætlun sem var sjötíu og fimm milljónir króna. Halldór Blöndal óttast að hann fari yfir hundrað milljónir. Hann segir of skammt sé frá því að iðnaðarmenn luku störfum til að hægt sé að segja til um kostnaðinn á þessari stundu en það verði birt með haustinu. Hann segir að áætlun hafi ekki gert nægilega ráð fyrir aukaverkum við framkvæmdina en þau hafi reynst umtalsverð. Þá hafi sumarþingið valdið töfum og óhagræði, auk þess sem þá hafi orðið að leggja til bráðabirgðafrágangs svo þing gæti komið saman. Fjórða og síðasta áfanga endurbótanna lýkur á næsta ári.