Óheppinn ökumaður

Tæplega þrítugur Frakki varð á dögunum fyrir þeirri martraðarkenndu reynslu að hraðastillirinn (cruiscontrolið) í bílnum hans festist á 190 km hraða. Ofsaakstur mannsins hófst þegar hann var að fara fram úr vörubíl á hraðbraut. Þegar hann ætlaði að draga úr hraðanum eftir framúraksturinn gat hann það ekki. Þess í stað hélt hraðinn áfram að aukast þar til hraðastillirinn festist í 190 km hraða. Ökumaðurinn segist hafa reynt að vara aðra bílstjóra við með því að blikka ljósum. Hann reyndi svo að stöðva bifreiðina með því að draga út lykilspjaldið en án árangurs. Þá hafði ökumaðurinn samband við lögreglu og bað um aðstoð. Lögreglan greiddi leið ökumanns og farartækisins stjórnlausa með tilkynningum á vegskiltum og gegnum útvarp um hraðaaksturinn. Ökumanninum tókst loks að stöðva bifreiðina og þá með því að stíga bremsuna af öllu afli.