Áfram leynd um Línu Net

Fulltrúar Sjálfstæðisflokksins í Orkuveitu Reykjavíkur fá ekki að sjá endurskoðanaskýrslu Línu Nets eins og þeir hafa beðið um. Lína Net var dótturfélag Orkuveitunnar. Guðlaugur Þór Þórðarsson, borgarfulltrúi Sjálfstæðisflokksins, segir að stjórn Línu Nets hafi synjað beiðninni. Meirihluta stjórnarinnar mynda þeir Alfreð Þorsteinsson og Stefán Jón Hafstein, fulltrúar Reykjavíkurlistans. Guðlaugur segir að þetta sýni hvað lítið sé að marka lýðræðisumræðu Reykjavíkurlistans. "Þarna hafa þeir tapað gríðarlegum fjárhæðum sem skattgreiðendur borga en engin skýring er gefin á því og við fáum ekki að sjá skýrslur um málið."