Hnykkir hross uppi á kassa

Hvernig fer létt manneskja að því að hnykkja hross sem er margfalt sterkara en hún? Það vefst ekki fyrir dýralækninum og hnykkjaranum Susanne Brown sem stendur uppi á kassa við verkið. Hér á landi hefur nú tekið til reglulegra starfa í fyrsta sinn hestahnykkjari. Slík meðferð gagnast helst hrossum sem hafa lent í slagsmálum eða slysum eða stríða við eymsli og vöðvabólgu. Fyrst horfir Susanne á hrossið hreyfa sig til að átta sig á vandamálinu og tekur svo til óspilltra málanna og stendur uppi á kassa til að auðvelda sér verkið. Vöðvar hrossa eru mjög stóri svo hvernig skyldi þetta vera mögulegt þegar aflsmunurinn er svo mikill? Susanne segir þetta sé ekki spurning um kraft heldur tækni og tilfinningu. Hún fari frá hausnum og vinni sig aftur að tagli og taki á öllum liðum. Hún lækni hestana með léttum hnykk. Og það sést greinilega að hrossin láta sér þetta vel líka. Susanne hefur aldrei þurft að gefa hrossi róandi lyf fyrir meðferð. Hún segir að hrossin finni ekkert til heldur slappi af og róist og verði syfjuð. Hún nefnir dæmi af meri sem hún hafi hnykkt. Hún hafi hreinlega lokað augunum.