Chelsea áfram eftir frábæran leik

Chelsea er komið áfram í 8-liða úrslit Meistaradeildar Evrópu eftir ótrúlegan 4-2 sigur á Barcelona á Stamford Bridge og 5-4 samanlagt. Eiður Smári kom Chelsea yfir strax á áttundu mínútu, Frank Lampard kom þeim í 2-0 á þerri sautjándu og Damien Duff skoraði þriðja markið á nítjándu mínútu og Chelsea í virkilega þægilegum málum. En í röðum Barcelona er snillingur að nafni Ronaldinho og fyrir hlé hafði hann skorað tvö mörk og Barca skyndilega komnir með pálmann í hendurnar, en eins og staðan var þarna var Barcelona áfram á mörkum skoruðum á útivelli. Barcelona hafði tögl og haldir í leiknum og var það þvert gegn gangi leiksins að John Terry skoraði fjórða mark Chelsea þrettán mínútum fyrir leikslok, markið sem kom liðinu áfram í átta liða úrslitin.