Terry sakar Ballack um leikaraskap

John Terry, varnarmaður Chelsea, vandaði leikmönnum Bayern og dómurunum ekki kveðjurnar eftir 4-2 sigur sinna manna á Bayern Munchen í Meistaradeildinni í gærkvöldi. "Ég er mjög vonsvikinn yfir ákvörðun dómaranna að dæma Ballack víti á lokasekúndunum. Við börðumst eins og ljón til að ná þriggja marka forystu í leiknum og að sjá hana tekna frá okkur á þennan hátt er óþolandi. Dómararnir voru búnir að líta framhjá þessum dýfutilburðum þeirra allan leikinn, en svo falla þeir fyrir einu lúalegu bragði á síðustu sekúndunum. Við hér á Englandi spilum ekki svona fótbolta, en liðin af meginlandinu reyna alltaf að koma hingað og kasta sér niður út um allan völl og leiða dómarana í gildru - þetta er óþolandi," sagði Terry æstur eftir leikinn.