Samið um 40 ljósleiðaratengingar

Í dag var undirritaður samningur milli Reykjavíkurborgar og Og fjarskipta um 40 ljósleiðaratengingar vegna jafn margra starfsstaða borgarinnar. Samningurinn gildir til fjögurra ára og var gerður í kjölfar útboðs á ljósleiðaratengingum fyrir helstu starfsstaði borgarinnar. Verðmæti samningsins er um 111 milljónir króna. Samningur gerir Reykjavíkurborg kleift að efla gagnanet borgarinnar og jafnframt að tengja fleiri staði fyrir sömu eða lægri upphæð en hingað til hefur verið mögulegt. Þá verður bæði einfaldara og hagkvæmara að auka afköst og öryggi netsins frá því sem nú er, ásamt því að bregðast við óskum um öflugri tengingar fyrir alla starfsemi borgarinnar þegar þörf er á.