Veigar skoraði tvö fyrir Stabæk

Veigar Páll Gunnarsson lék allan leikinn og skoraði tvö af mörkum Stabæk sem valtaði yfir Pors Grenland, 8-1 í lokaumferð 1. deildar í norska fótboltanum í dag. Veigar skoraði samtals 13 mörk í deildinni þetta tímabilið og varð þriðji markahæsti leikmaðurinn. Mörk Veigars í dag komu á 24. mínútu og 61. mínútu sem komu Stabæk í 3-0 og 6-0. Athyglisvert er að fyrri viðureign þessara liða lauk með markalausu jafntefli í júlí sl.

Stabæk var fyrir nokkru búið að tryggja sér sæti í efstu deild að nýju og lauk keppni efst í 1. deildinni. Sandefjord tryggði sér í dag sæti í efstu deild í fyrsta skipti í 40 ár þegar liðið náði 2. sæti í 1. deild með 4-3 sigri á Moss en Sandefjord hefur ekki leikið í efstu deild síðan 1965. Moss hafnaði í 3. sæti og þarf að heyja umspil við Molde sem lenti í þriðja neðsta sæti í efstu deild, um sæti í efstu deild að ári.