Stefni á að spila næsta sumar

Sigurður Ragnar Eyjólfsson leikmaður ÍA er á góðum batavegi eftir aðgerð sem hann gekkst undir í byrjun desember. Sigurður sleit krossband á æfingu hjá Skagamönnum í september en stefnir ótrauður á að spila næsta sumar.

"Ég er að hjóla og lyfta mikið og svo má ég byrja að skokka í næsta mánuði," Það er talað um að menn geti æft sex mánuðum eftir þessi meiðsli og sá tími er í byrjun júní hjá mér. Ég næ því vonandi nokkrum leikjum í sumar." sagði Sigurður Ragnar í gær. "Aðgerðin gekk mjög vel og allt hefur gengið að óskum hjá mér auk þess sem ég er í mjög góðum höndum. Ég stefni á að ná að spila næsta sumar og það hjálpar mér mikið að hafa markmið í endurhæfingunni. Það er þó ljóst að ég byrja ekki að æfa fyrr en ég hef náð mér alveg.