Enginn pantaði risaþotu á árinu

Pantanir á flugvélum hjá evrópsku flugvélasmiðjunum Airbus hafa dregist mikið saman á milli ára. Á fyrstu sex mánuðum ársins voru pantaðar 117 nýjar flugvélar sem er 159 flugvélum færra en á sama tíma í fyrra.

Þessu er öfugt farið hjá Boeing, helsta keppinauti Airbus. Flugfélög víða um heim hafa á fyrstu sex mánuðum ársins tryggt sér 487 Boeing-vélar, sem er 48 vélum fleiri en á sama tíma fyrir ári.

Fjármálasérfræðingar segja ljóst að neikvæð umræða um fyrirtækið í kjölfar tafa á framleiðslu A380 risaþotum félagsins hafi skaðað Airbus.

érfræðingarnir búast hins vegar við að hagur fyrirtækisins batni á árinu en líkur eru sagðar á að fyrirtækið nái góðum samningum á Farnborough flugvélasýningunni í Bretlandi síðar í þessum mánuði.

Að sögn breska ríkisútvarpsins hafa engar pantanir borist í A380 risaþotur frá Airbus á þessu ári.

Þrátt fyrir hremmingar vegna framleiðslu á A380 risaþotunum, sem verða þær stærstu í heimi, hefur Airbus aldrei selt fleiri flugvélar en á þessu ári. Fyrirtækið hefur það sem af er árs selt 219 vélar og er það 30 vélum meira en á sama tíma í fyrra.