Aukið atvinnuleysi í Bretlandi

Atvinnulausum fjölgaði um 5.900 manns í Bretlandi í síðasta mánuði og eru þeir sem eru án vinnu í landinu tæplega 957 þúsund talsins. Atvinnuleysi í Bretlandi mælist nú 5,4 prósent og hefur ekki verið meira síðan á vordögum árið 2000, samkvæmt upplýsingum bresku hagstofunnar.

Þá hefur atvinnulausum fjölgað um 93.000 frá sama tíma í fyrra.

Fjármálasérfræðingar segja upplýsingar um atvinnuleysi í landinu slá á ótta manna um aukna verðbólgu í landinu og búast því við óbreyttum stýrivöxtum út árið.