Þetta er mjög svekkjandi

 Norska félagið Fredrikstad keypti Garðar af Val á dögunum og þegar sótt var um keppnisleyfi fyrir framherjann neitaði norska knattspyrnusambandið að staðfesta félagaskiptin. Ástæðan fyrir synjuninni er sú að leikmenn mega aðeins leika með tveim félögum á hverju tímabili og Garðar hefur þegar leikið með tveimur félögum, KR og Val, á tímabilinu en nýtt tímabil hjá FIFA hófst 1. júlí.

Þessi staða gæti leitt til þess að Fredrikstad rifti samningum og því verði Garðar að koma aftur heim. Knattspyrnusamband Íslands, er að vinna í málinu fyrir Garðar og hefur sótt um undanþágu fyrir Garðar. Ekki er von á að málið leysist fyrr en eftir viku til tíu daga að því er Garðar segir.

"Þetta er ferlega svekkjandi og maður er auðvitað hundfúll yfir því að þessi staða sé komin upp," sagði Garðar við Fréttablaðið í gær en hann átti að leika fyrsta leik sinn fyrir félagið í dag. Af því verður augljóslega ekki og hann kemur því heim til Íslands á mánudag. Fari málið á versta veg er ekki loku fyrir það skotið að hann klári tímabilið með Val en hann mun væntanlega byrja að æfa með félaginu á ný strax eftir helgi.

"Ég veit ekki hvort þetta hefur áhrif á söluna en þeir vilja ólmir halda mér og ætla að reyna allt hvað þeir geta til að klára málið á farsælan hátt. Það er vonandi að FIFA sýni málstað okkar skilning enda liggur munurinn í því að á Íslandi er áhugamannaumhverfi þar sem leikmenn geta flestir ekki lifað eingöngu af knattspyrnunni og ef þeir sjá það er vonandi að þeir veiti mér þessa undanþágu, það verða langir dagarnir á meðan maður bíður eftir því að málið leysist," sagði Garðar.