Túrkmenar skrúfa ekki fyrir gas til Rússa

Viðskipti Rússneska ríkisgasfyrirtækið Gazprom hefur samþykkt að greiða 35 prósenta hærra verð fyrir jarðgas frá Túrkmenistan. Fyrirtækið greiddi 65 Bandaríkjadali eða tæpar 4.600 krónur fyrir hverja 1.000 kúbikmetra fyrir gas frá landinu en mun greiða 100 dali eða rúmar 6.900 krónur fram til loka árs 2008 fyrir sama magn. Verðhækkunin bindur enda á deilur landanna á milli en Túrkmenar hótuðu að skrúfa fyrir gas til Rússlands yrði ekki gengið að verðinu. Gazprom flytur gasið út til annarra landa og er óttast að hækkunin muni koma illa niður á viðskiptalöndum fyrirtækisins, ekki síst fyrir Úkraínumenn sem eru háðir innflutningi á gasi frá Rússlandi. Rússar og Úkraínumenn deildu harkalega um viðskipti með gas um síðustu áramót en Úkraínumenn greiddu fjórfalt lægri upphæð fyrir jarðgas en aðrar viðskiptaþjóðir Gazprom. Þegar sættir um verð náðust ekki skrúfaði Gazprom fyrir gasútflutning til Úkraínu og hafði það áhrif til annarra landa. Skömmu eftir áramót náðist samkomulag í gasdeilunni en ekki hefur verið greint frá hvað í því felst að öðru leyti en því að það gildi til ársins 2008. Sérfræðingar óttast að samkomulagið geti verið í hættu því Gazprom hafi fram til þessa nýtt ódýrt jarðgas frá Túrkmenistan til að niðurgreiða gas til Úkraínu. - jab