Leikur Ameobi á laugardag verður sá síðasti á tímabilinu

Á sunnudagsmorgun mun Shola Ameobi fara um borð í flugvél sem flytur hann til Colorado-fylkis í Bandaríkjunum þar sem hann mun gangast undir afar mikilvæga aðgerð. Hann gæti þurft að pína sig áfram upp tröppurnar og móðir hans, sem kemur með honum í ferðina, gæti þurft að hjálpa honum til sætis.

Það fer eftir því hvort Ameobi spilar með Newcastle gegn Arsenal á laugardag. Það er þó öruggt að það verður hans síðasti leikur á tímabilinu.

„Ég vil spila þar sem ég fer í aðgerðina á þriðjudag og veit að þetta verður síðasti leikur minn á tímabilinu,“ sagði Ameobi sem er fæddur í Nígeríu en uppalinn í Englandi. „Ég hef átt við mikil vandræði að stríða í mjöðm undanfarin tvö ár og ástandið hefur aðeins versnað síðustu mánuði. Ef ég fer ekki í aðgerðina gæti ferli mínum verið lokið.“

Þegar Ameobi hefur spilað undanfarið hefur það þýtt mikla verki næstu daga eftir leiki.

Newcastle hefur átt í miklum vandræðum það sem af er tímabilinu en Ameobi hefur alltaf veitt Glenn Roeder knattspyrnustjóra og Freddy Shepher stjórnarformanni sinn stuðning. Hann segir að enginn hafi þvingað sig til að spila. „Ég hef sjálfur viljað spila en það hefur tekið sinn toll í ýmsum atriðum er varða minn leik. Ég hef upplifað á stundum mikinn sársauka og hef ég fengið ýmsar sprautur vegna þessa. En stundum á ég erfitt með gang í tvo daga.“

Undir lok síðasta tímabils skoraði Ameobi nánast mark í hverjum leik liðsins en liðinu hefur gengið skelfilega í haust og er við fallsvæði deildarinnar. Ameobi segir að gefa verði Roeder tíma. Alan Shearer sé hættur, Michael Owen meiddur og Obafemi Martins enn að aðlagast enskri knattspyrnu.

„Skortur á framherjum hefur háð okkur. Ef Thierry Henry yrði tekinn úr Arsenal og Didier Drogba úr Chelsea myndu liðin ekki vera söm. Við höfum trú á stjóranum og á því að við getum náð okkur á strik og unnið nokkra leiki í röð.“- esá