Mjög sérstakt að skora sigurmarkið

Peter Crouch framherji Liverpool var í skýjunum eftir að hafa skorað sigurmarkið gegn Manchester United í FA bikarkeppninni í dag. Crouch skoraði eina mark leiksins á 19. mínútu með góðum skalla sem dugði til sigurs.

"Þetta er líklega stærsta mark sem ég hef skorað á ferlinum," sagði þessi ógnarstóri framherji. "Liverpool gegn Manchester United er líklega stærsti leikurinn í enska boltanum og að skora sigurmarkið er mjög sérstakt. Við vorum harmi slegnir þegar þeir skoruðu sigurmarkið á lokamínútunni á Old Trafford um daginn en þetta bæti upp fyrir það."

"Mér fannst við verðskulda sigurinn. Við mættum þeim vel, spiluðum hraðann bolta og sköpuðum fleiri góð færi. Þetta var frábær sigur hjá okkur og við ætlum okkur að njóta hans vel."