Fínt að vera vanmetinn

Alex McLeish, stjóri Glasgow Rangers, segist fagna því að mótherjar liðsins í Meistaradeildinni skuli vera sigurvissir fyrir leikinn í kvöld, en liðsmenn spænska liðsins Villareal fögnuðu ákaft þegar ljóst varð að þeir fengju skosku meistarana sem mótherja í 16-liða úrslitunum.

"Það kom fólki nokkuð á óvart að við skyldum komast áfram úr riðlakeppninni og ég veit að Villareal áleit sig heppið að mæta okkur í 16-liða úrslitunum. Það hentar okkur ágætlega að vera álitnir litla liðið í viðureigninni, því það setur aukna pressu á Villareal," sagði McLeish.